人地見慣不怪，我見不慣，所以勁好奇... ... 到底點解Cova 的蛋糕可以貴到咁!!!!!!! 終於有機會俾我一試佢既蛋糕喇~~~ 男友係某電話台的VIP，生日月份獲贈Cova 1磅裝蛋糕，好興奮呀! 據說係最好味既系例Cheese Cake，到底有咩咁特別? 即將揭曉。 把刀都型過人架喎~~~ 上面超多生果，粒粒都咁甜架! 連個黑朱古力牌都好味喎~ haha 芝士切餅非常滑溜，甜而不膩，果然絕不簡單。 到底佢用咩牌子既cream cheese 做既呢? 介紹完貴價蛋糕，講番d 平野俾你地知。 超級市場最近出左一種咁既蛋糕仔，唔洗$10 就買到～ 有4種味道：原味、朱古力味、士多啤梨味及Tiramisu味。 我認為原味同朱古力味最正！

神奇嗎? 一邊白色的，一邊烘底的。兩種口味，同時享受。 內面夾左花生醬及煉奶，所以唔係好睇到個餡。 最正既口感係一邊軟綿綿的熱麵包，一邊係脆卜卜的多士。 記住唔好用太高溫烘呀，唔好食架～　會乾晒架！

呢碗飯都算簡簡單單得黎，又好好味既一道菜喇! 不過我係用美國雞蛋炒架呢碗飯。 然後再加點綠油油的蔥，面頭再灑一點點韓式辣魚仔～　YUMMY 要唔要整番啖呀? 我指碗飯呀~~~~ ^_^

呢間叫Sugar 既cafe 位於尖沙咀利士後街 (嘉蘭圍)，服務態度好好架! 食物質素都唔錯~~~ 我琴晚外出採訪，第一次去呢間cafe，環境唔係優美，但係價錢合理。 上面果個朱古力香蕉Waffle，由於製作需時，我都等左廿分鐘左右先有得食。 外脆內軟，配埋朱古力醬同雲呢拿雪糕，大大碟先$32 仲會有埋sugar 個logo 係隻碟上面，好有心思~~~ 呢間鋪都係由一班年青人打理，雖然我唔知道佢地係咪店主or 合夥人，但係工作細心有禮，算係咁啦! 我朋友就食左個星星涼粉，影得唔係好清楚tim... 有生果伴住，面頭仲有舊芒果雪糕，唔錯唔錯~ 我見其他人多數食雪糕糖水 --> 中西合壁，都幾搞笑!

好開心呀~~~好耐無試過突破100 人次!!! 奇偉要繼續努力呀~~~ YEAH

vyvy 介紹的破柴雞翼，好好食呀!!! 不過切就切到手軟呀~ 半隻雞翼，打直咁切，好似搣開木筷子咁切呀。 1. 雞翼先解凍。解凍後用刀切開一半。 2. 隨個人口味加老抽、五香粉、麻油、胡椒粉醃約3小時。 3. 以200度焗10分鐘即可食用。 又入味又方便食用，仲唔怕焗到外面火農晒，入面都未熟的情況出現tim ar!

恭喜奇偉蛋糕小女皇，我讀緊畢業班了~~~ 呢個就唔係畢業證書，呢個係朱古力鳳凰卷。 朱古力流晒出黎!!!　要快快手影～　震左少少～　Focus 錯左! 見唔見中間d 朱古力要跳出黎喇?! 以上的「卷」都係用春卷皮整架~ 200 度焗10 分鐘即成。

估唔到我亂咁將d 野夾入去都幾好食。 入面有菠蘿、蟹柳、芝士、沙律醬，哈哈! 新鮮菠蘿黎架~~~ 冰鮮北海道蟹柳，好鮮甜呀! 用焗爐烘左底，150 度10 分鐘~ 熱辣辣，熱氣到爆呀! 溶溶地既芝士真係無法抗拒呀!!! 最後一個shot~~~ heehee

又簡單又美味快捷的健康甜品，用春卷皮包住，又係用焗爐焗... ...點可以忍口呀? 等我慢慢介紹佢地啦~ 首先有一小碟奇異果 + 蘋果沙律 三角形果個係芝士脆脆批 ---> 切開左立即見到溶出黎既芝士。 呢個係蘋果批，d 蘋果多到爆出黎呀~~~ 熱到蘋果汁擠埋都出埋。 急不及待要吃了!!!!!! 呵呵呵~~~ 其實我當呢個係lunch 架喇~~ 減肥啊!

Brownie 係家姐做的，香蕉朱古力粒鬆餅係我做的，睇番上一個網誌參閱食譜啦～ 香蕉沙律卷都係我整既～　用春卷皮包起幾片香蕉，加少少沙律醬 卷起放入焗爐用200 度焗5- 10分鐘，免油炸~ 瘦好多呀! 香蕉沙律卷焗完之後，溶埋一齊，超正呀! 相信任何水果都可以用呢個做法整~~~ 原本咁單調既早餐加左幾片香蕉，再加埋朱古力鬆餅，加埋香蕉沙律卷， 豐富晒~~~ 成為全蕉宴呀!!!